ദുരൂഹത

ഞാനൊരു നിമിഷം കണ്ണടച്ചു കിടന്നു മനസ്സ്‌ സ്വസ്ഥമാവാന്‍. പെട്ടെന്നു ഞാന്‍ നക്ഷത്ര രാജ്യത്തെ ത്തപ്പെട്ടതുപോലെ. ചുറ്റിനും നക്ഷത്രങ്ങള്‍. ഞാനും അതിലൊരു നക്ഷത്രമെന്നപോലെ സഞ്ചരിക്കുന്നു. എനിക്ക്‌ ആത്മാവുമാത്രമേ ഉള്ളോ, ഞാന്‍ മരിച്ചു കഴിഞ്ഞോ എന്നൊരു നിമിഷം ശങ്കിച്ചു. എന്റെ ശരീരം നഷ്ടപ്പെട്ടോ എന്നു നോക്കുമ്പോള്‍ എന്തോ ഒന്നു ചുറ്റിനും ഉണ്ട്‌. പക്ഷെ ഈ ശരീരമല്ലായിരുന്നു.

പിന്നീട്‌ ഞാന്‍ കരുതി, മരണശേഷം ജീവിതമുണ്ട്‌. ഭൂമിയിലെ മനുഷ്യര്‍ക്ക്‌ കാണാനാകാത്ത ബന്ധ പ്പെടാനാകാത്ത ഒരിടത്ത്‌. ഇവിടെതന്നെ ഉദാഹരണങ്ങളുണ്ടല്ലോ. ഞാന്‍ അന്യനാട്ടില്‍ ജീവിക്കുന്നു. എന്റെ ഒപ്പം ജീവിച്ചിരുന്നവരൊക്കെ ജന്മനാട്ടിലും. ഫോണ്‍ കണ്ടുപിടിക്കപ്പെട്ടതുകൊണ്ട്‌ എനിക്ക്‌ അവിടത്തെ വിശേഷങ്ങള്‍ അറിയാം. അല്ലെങ്കില്‍ തപാലിലൂടെ. ഇതൊന്നുമില്ലായിരുന്നെങ്കില്‍ എനിക്ക്‌ അവരുടെ ലോകവും അവര്‍ക്ക്‌ എന്റെ ലോകവും അപരിചിതം.

ഒരുപക്ഷെ മരിച്ചവരും ഈ ആഗ്രഹവുമായി അങ്ങകലെയെങ്ങോ ജീവിക്കുന്നുണ്ടാകാം. അവിടേയ്ക്കുള്ള ടെലിഫോണ്‍ കണക്ഷന്‍ ഇല്ലാത്തതുകൊണ്ട്‌, സാറ്റലൈറ്റ് ടി. വി. കള്‍ ഇല്ലാത്തിടത്തോളം, അവരും നാമും ആ ഓര്‍മ്മകളുമായി സമാധാനമായി ജീവിക്കും. ഒരിക്കല്‍ കണക്ഷന്‍ സ്ഥാപിച്ചു കഴിഞ്ഞാല്‍, എരിയുന്ന ഹൃദയവുമായി, നഷ്ടസ്വപ്നങ്ങളെ താലോലിച്ചുകൊണ്ട്‌ , ഒരിക്കലും ഒന്നിക്കാനോ, നഷ്ടപ്പെട്ടതു തിരിച്ചു കിട്ടാനോ കഴിയാതെ നോക്കി നെടുവീര്‍പ്പിടാം.